Gunnhildur Yrsa lék sinn fyrsta leik með Val í kvöld
„Þetta var svona brasleikur en það er búið að vera langt frí og það er gott að við tökum þrjú stig með okkur heim,“ sagði Gunnhildur Yrsa Jónsdóttir, A-landsliðskona og nýjasti leikmaður Vals, eftir 1-0 sigur á KR í kvöld.
Gunnhildur var að snúa aftur í íslenska boltann eftir 8 ára fjarveru og stóð sig vel á miðsvæðinu hjá Val.
„Ég er búin að æfa með liðinu í sirka 10 daga en stelpurnar hafa tekið vel á móti mér og komið mér vel inn í þetta og þjálfararnir líka. Það hefur hjálpað mjög mikið, sagði Gunnhildur um undirbúninginn með Valsliðinu en hrósaði svo andstæðingunum fyrir þéttan varnarleik.
„KR komu mjög sterkar í dag. Þær voru mjög góðar og það var erfitt að brjóta þær niður. Við áttum erfitt með að skapa okkur færi á síðasta þriðjungi en KR-stelpurnar voru mjög þéttar og góðar varnarlega. Þær gerðu þetta mjög erfitt fyrir okkur. Ég átti náttúrulega að setja eitt og tek það á mig.“
Aðstæður til knattspyrnuiðkunar eru undarlegar um þessar mundir vegna Covid og allskyns skilyrði sem liðin þurfa að uppfylla til að hægt sé að spila á Íslandsmótinu. Gunnhildur Yrsa þekkir það vel frá Bandaríkjunum og er lítið að velta fyrir sér öðru en að spila fótbolta.
„Ég var búin að kynnast þessu úti. Reglurnar eru svipaðar, jafnvel strengri úti, þannig að þetta hafði engin áhrif á mig.“
Nánar er rætt við leikmanninn öfluga í spilaranum hér að ofan.
Athugasemdir
