Besta deildin: Fylkir klifrar upp úr botnsætinu

Fylkir hefur rifið sig upp úr botnsætinu eftir sigur á Vestra í kvöld í Árbænum.

Gestirnir náðu forystunni þegar fyrirliðinn Elmar Atli Garðarson kom boltanum í netið eftir hornspyrnu. Liðið var ekki lengi með forystuna þar sem Matthias Præst skoraði með föstu skoti inn á teignum eftir sendingu frá Emil Ásmundssyni.

Fylkismenn fengu færi til að komast yfir í seinni hálfleiknum og loksins nýttu þeir það þegar Þóroddur Víkingsson skoraði.

Það var síðan Ómar Björn sem innsiglaði sigur Fylkismanna þegar hann komst í gegn eftir sendingu frá Nikulási Val.

Jeppe Gertsen tókst að klóra í bakkann með laglegu skoti fyrir utan vítateiginn. Vestri komst í hörku færi stuttu síðar en Ólafur Kristófer Helgason markvörður Fylkis varði stórkostlega.