Edda Garðarsdóttir er aðstoðarþjálfari Vals.
,,Við lentum manni undir snemma í fyrri hálfleik en mér fannst við gera frábærlega. Það var mikil barátta og skynsemi í stelpunum okkar," sagði Edda Garðarsdóttir aðstoðarþjálfari Vals eftir 1-1 jafntefli við Þór/KA í dag.
Lestu um leikinn: Valur 1 - 1 Þór/KA
,,Svo náum við að setja hann og þá fór ég að hugsa, 'nú er þetta komið' og var hálf farin að fagna inni í mér. Þá kemur þarna ólukku augnablik og þær ná að jafna."
Mist Edvardsdóttir fékk að líta rauða spjaldið eftir hálftíma leik og Þór/KA fékk víti sem Þórdís María Aikman varði. Hvað fannst Eddu um dóminn?
,,Ég sá þetta ekki nógu vel. Það er oft sem er barátta inni í teig og það er erfitt að sjá þegar það er hrúga af fólki og svo liggur ein eftir. Hann hlýtur að hafa séð þetta í fullkominni stöðu fyrst hann dæmir víti og rautt spjald. Það verður bara að treysta því. Dómarar þurfa að taka ákvörðunina á einu stuttu augnabliki og hafa ekki tækifæri til að melta neitt, maður treystir því að þeir vinni sín störf og geri það vel."
,,Þetta var einstaklega vel varið hjá Þórdísi og var bensín fyrir okkur restina af leiknum. Bara frábært."
Dóra María Lárusdóttir fór í miðvarðarstöðuna eftir að Mist Edvardsdóttir sá rauða spjaldið.
,,Við höfum verið óheppnar með miðverðina okkar, það er ólétta og krabbamein og bévítans ólukka og ein er sennilega með beinmar eftir bikarleikinn á móti blikunum. Að sjá svo drottninguna Dóru Maríu og leysa þetta svona glimrandi vel, því ber að fagna. Hún er ein af þeim sem er með það góðan leikskilning og frábær í fótbolta að hún gæti leyst hvaða stöðu sem er inni á vellinum nema markið, því hún kann ekki að grípa," sagði Edda að lokumog brosti.
Athugasemdir
