Venjan er að ef leikur endar með jafntefli í FA bikarnum verði annar leikur spilaður en ekki farið í framlengingu. Á tímum Covid var því hætt til að minnka álagið og koma í veg fyrir að leikir stangist á.
Leikjum á Englandi var frestað fyrir viku og nokkrum leikjum um liðna helgi vegna andláts Elísabetar Bretadrottningar. Þá byrjar deildabikarinn seinna en venjulega vegna HM í Katar sem hefst í lok nóvember.
Félögin í ensku úrvalsdeildinni funda á morgun og meðal umræðuefna verður breytingar á FA bikarnum og deildabikarnum.
Samkvæmt heimildum The Times er lagt til að frá og með árinu 2024 verði ekki lengur endurtekinn leikur í FA bikarnum og úrvalsdeildarfélög mega bara nota leikmenn 21 árs og yngri í deildabikarnum eða jafn vel að sú keppni verði bara fyrir lið í neðri deildum.
Þetta mun minnka álagið hjá úrvalsdeildarfélögunum.