Meiðsli hafa verið að hrjá Ragnar og gat hann ekki tekið þátt í leikjunum sem spilaðir voru áður en kórónuveirufaraldurinn skall á í Evrópu og setti allt fótboltahald í biðstöðu.

Hann er hins vegar búinn að jafna sig í hléinu og spilar með FCK í æfingaleik á morgun. Danska úrvalsdeildin á að hefjast aftur í lok þessa mánaðar.

Hinn 33 ára gamli Ragnar sneri aftur til Kaupmannahafnar í janúar síðastliðnum eftir dvöl í Rússlandi hjá Rostov. Hann lék áður með FCK frá 2011 til ársins 2014. Í janúar gerði Raggi samning til 30. júní, en vegna kórónuveirunnar eiga félög í Danmörku kost á að framlengja samninga við leikmenn um einn mánuð svo að þeir klári tímabilið með félögunum.

Leikmennirnir sem voru að renna út á samningi í sumar eru nú samningsbundnir til 31. júlí en möguleiki er á að samningarnir verði framlengdir til lengri tíma þar sem FCK á eftir að mæta Istanbul Basaksehir í Evrópudeildinni og líklegt er að sá leikur verði í ágúst.

FCK er í öðru sæti dönsku úrvalsdeildarinnr, 12 stigum á eftir toppliði Midtjylland. Mikael Neville Anderson leikur með Midtjylland.