„Þetta var hörkuleikur. Það er erfitt að spila á móti FH og þær sýndu það í kvöld. Ég er mjög sáttur með þrjú stig og þrjú mörk.“ sagði Pétur Pétursson, þjálfari Vals, eftir 3-1 sigur á FH í kvöld á Hlíðarenda.
Lestu um leikinn: Valur 3 - 1 FH
Var Pétur ósáttur með að fá á sig þetta seinasta mark sem kom í veg fyrir það að Valsliðið héldi hreinu.
„Mér fannst þetta óþarfi. Þarna áttum við að koma boltanum í burtu. En Ída er góð skotmanneskja og frábært mark hjá henni.“
Anna Úrsúla var á bekknum hjá Val í kvöld annan leikinn í röð. Hver er ástæðan fyrir því?
„Íris er ekki með okkur eins og er. Anna Úrsúla stekkur inn í þetta fyrir okkur sem er frábært. Frábær markmaður í gamla daga og frábær íþróttakona.“
Hefði hún kannski átt að velja fótboltann á sínum tíma?
„Ég veit það ekki, þú verður að spurja hana að því.“
Pétur bætti svo við.
„Hún (Íris) verður mætt eftir næsta leik.“
Það styttist mjög í Berglindi segir Pétur.
„Það styttist mjög mikið í Berglindi Björg. Það má alveg búast við henni bráðlega.“
Pétur gaf út pistil á dögunum þar sem hann sagði að Stöð Tvö Sport gæti gert miklu betur í kringum leiki í Bestu deild kvenna. Fékk Pétur einhver viðbrögð við þeim pistli?
„Ég sá að það var góður panell á Víkingsvellinum í gær. Það var bara frábært og gott hjá þeim að taka tillit til þess og gera þetta betur.“
En fékk Pétur einhver viðbrögð frá Stöð Tvö Sport eða Sýn?
„Nei.“
Viðtalið við Pétur má sjá í heild sinni í spilaranum hér að ofan.
