Gennaro Ivan Gattuso, þjálfari ítalska landsliðsins, svaraði enn og aftur spurningum um fjarveru Federico Chiesa í landsliðinu, en hann segir að vandamálið liggja hjá leikmanninum en ekki þeim sem stýra liðinu.
Chiesa hefur hafnað landsliðskallinu í síðustu tveimur gluggum en Gattuso vill ólmur fá hann aftur í hópinn.
Liverpool-maðurinn hefur hingað til sagt nei. Markmið hans er að koma sér í betra form og vinna sér sæti í liðið hjá Arne Slot og framhaldið síðan skoðað í kjölfarið.
Gattuso var spurður út í það hvort hann ætli sér að kalla Chiesa í landsliðið fyrir HM-umspilið í mars, en þjálfarinn sagði það alltaf vera planið en að ákvörðunin liggur hjá Ítalanum.
„Þú þekkir þetta mjög vel. Ég hringi í Chiesa fyrir hvern einasta landsleikjaglugga. Vandamálið er ekki Gattuso eða þjálfarateymið. Þetta er hans vandamál, ekki okkar. Þú veist þetta,“ sagði Gattuso.
Athugasemdir
