Spánn: Mögnuð endurkoma Atletico

Atletico Madrid og Valencia áttust við í lokaleik kvöldsins í spænska boltanum og tóku gestirnir frá Valencia forystuna í fyrri hálfleik.

Yunus Musah skoraði á 25. mínútu og tvöfaldaði Hugo Duro forystuna skömmu fyrir leikhlé.

Diego Simeone hefur lesið pistilinn yfir sínum mönnum í hálfleik. Hann gerði eina skiptingu og tóku heimamenn í Madríd stjórn á leiknum en áttu þó áfram í erfiðleikum með að koma knettinum í netið.

Matheus Cunha minnkaði muninn á 64. mínútu, sjö mínútum eftir að hafa komið inná, og juku heimamenn sóknarþungan undir lokin og settu í fimmta gír í uppbótartíma. Angel Correa, sem hafði komið inn af bekknum í leikhlé, jafnaði leikinn á 91. mínútu og fullkomnaði Mario Hermoso endurkomuna á 93. mínútu.

Mögnuð endurkoma Atletico og er liðið áfram í fjórða sæti deildarinnar, þremur stigum fyrir ofan Real Sociedad sem á leik til góða á morgun.