Fyrsti grasleikurinn verður í Krikanum

Fyrsti grasleikurinn í Bestu deildinni verður spilaður á Kaplakrikavelli á morgun en KR-ingar koma þá í heimsókn.

Kaplakrikavöllur er klár í slaginn en leikur ÍA og Vestra á morgun verður spilaður innandyra í Akraneshöllinni.

„Grassérfræðingar telja Akranesvöll ekki leikfæran að svo stöddu og að leikur á vellinum á þessum tímapunkti gæti skaðað hann til lengri tíma," sagði í tilkynningu frá ÍA.

Á fimmtudaginn mun svo ÍBV leika gegn Fram á grasi á Þórsvelli í Vestmannaeyjum, sama velli og þar sem ÍBV vann Víking í bikarnum. Framkvæmdir standa yfir á Hásteinsvelli þar sem verið er að leggja gervigras.

Sá leikur átti upphaflega að hefjast 17:00 á fimmtudag en hefur verið færður til 16:00.

Þegar líða fer á tímabilið verða ÍA og FH einu tvö 'grasliðin' sem verða eftir í deildinni en eins og lesendur vita er verið að setja gervigras á heimavöll KR.