FH tók á móti Keflavík í efstu deild Lengjubikars karla í dag og leiddu Keflvíkingar með tveimur mörkum í leikhlé, eftir að Stefan Alexander Ljubicic skoraði tvennu.

Stefan skoraði fyrst úr vítaspyrnu á 35. mínútu og tvöfaldaði forystuna skömmu síðar.

Sami Kamel bætti þriðja markinu við í síðari hálfleik, áður en FH tókst að minnka muninn aftur niður í tvö mörk.

Það var undir lokin sem Óliver Andri Einarsson innsiglaði stórsigur Keflvíkinga með fjórða og síðasta marki gestanna í 1-4 sigri.

Keflavík hefur farið vel af stað í Lengjubikarnum og er með sjö stig eftir þrjár umferðir.

FH er með sex stig eftir fjórar umferðir.