Juventus heimsótti Hellas Verona í kvöldleiknum í Serie A deildinni á Ítalíu.

Juventus þurfti nauðsynlega á sigrinum að halda til að setja pressu á Inter og AC Milan. Hellas er um miðja deild í fínum málum.

Það var ekkert skorað í fyrri hálfleiknum en þrátt fyrir það var hann ágætlega fjörugur. Aron Ramsey og Federico Chiesa komust næst því að skora fyrir gestina. Þá átti Hellas Verona tilraun sem fór í slánna.

Mörkin komu hins vegar í síðari hálfleiknum. Markamaskínan Cristiano Ronaldo kom gestunum í forystu eftir flottan undirbúning frá Chiesa. Þetta var nítjánda mark Ronaldo í deildinni í vetur og er hann markahæstur sem stendur.

Heimamenn gáfust hins vegar ekki upp og sóttu mikið. Það var á 77. mínútu sem Antonin Barak jafnaði metin með hörku skalla. Hann fékk fyrirgjöf frá Darko Lazovic sem hann stangaði í netið af krafti.

Eftir þetta var Hellas líklegra liðið með Barak fremstan í flokki. Hann komst nálægt því í tvígang að skora sitt annað mark en Wojciech Szczesny stóð vaktina vel í marki Juventus.

Þetta jafntefli þýðir að Juventus er nú sjö stigum á eftir toppliði Inter Milan. Jafnteflið í kvöld var það sjöunda í vetur hjá Andrea Pirlo og lærisveinum hans.