Það fóru þrír leikir fram í sænsku B-deildinni í dag og kom Íslendingur við sögu í einum þeirra.
Það var í merkilegum sigri Trelleborg á útivelli gegn toppliði Halmstad sem er aðeins að tapa sínum öðrum leik á deildartímabilinu.
Þar byrjaði Böðvar Böðvarsson á bekknum og fékk að koma inn á 77. mínútu þegar Trelleborg var 1-0 undir. Eitthvað virtist nærvera Bödda hafa jákvæð áhrif því liðsfélagar hans sneru stöðunni við á lokakaflanum og stóðu uppi sem sigurvegarar, 1-2.
Trelleborg er í sjöunda sæti eftir sigurinn, fimm stigum eftir toppliði Halmstad.
Jonköping gerði þá 2-2 jafntefli við lærisveina Brynjars Björns Gunnarssonar í Örgryte.
Örgryte á enn eftir að vinna leik á tímabilinu en liðið er búið að gera þrjú jafntefli í þremur leikjum undir stjórn Brynjars auk þess að ná 2-2 jafntefli við Häcken í æfingaleik í júní.
Örgryte er á botni deildarinnar með 5 stig eftir 11 umferðir.
Halmstad 1 - 2 Trelleborg
1-0 J. Svedberg ('62)
1-1 H. Hallberg ('86)
1-2 N. Mortensen ('92)
Jonköping 2 - 2 Örgryte
0-1 S. Crona ('42, sjálfsmark)
1-1 M. Fazal ('50)
1-2 A. Zeljkovic ('68)
2-2 M. Moenza ('70)
