Steinar í gömlu hvítu skónum, það voru þeir bleiku sem gerðu gæfumuninn í kvöld.
„Hann var helvíti ljúfur þessi sigur," sagði Steinar Þorsteinsson leikmaður ÍA eftir 3 - 2 sigur á Val í Bestu-deildinni í kvöld.
Lestu um leikinn: ÍA 3 - 2 Valur
„Við byrjuðum illa og vorum að fá bolta afturfyrir okkur. Svo skora þeir og eftir það fannst mér við bregðast mjög vel við og komast í 2-1."
Það var pirrandi að fá á sig þetta jöfnunamark er það ekki?
„Jú það var lélegt, ég á eftir að sjá þetta betur en mér fannst þetta helvíti slakt hjá okkur."
Svo fékkst þú færið í lokin eftir að Viktor gaf út á þig og skoraðir þetta gull af marki. Hvað varstu að hugsa?
„Ég var ekkert að hugsa, ég ákvað að sveifla löppinni. Ég var nýbúinn að fá krampa og var bara heppinn að ég dreif á markið."
Steinar frumsýndi í dag nýja bleika skó. Eitthvað sem Jón Þór Hauksson þjálfari ÍA var ekki heillaður yfir en gaf grænt ljós ef hann fengi svona mark.
„Ég fékk reyndar smá auga frá honum þegar ég mætti á fyrstu æfinguna í bleiku en ég er ánægður með að hafa skorað. Þeir eru flottir maður, hefurðu ekki séð þá, þeir eru geggjaðir."
Athugasemdir
