Milan að kaupa bakvörð frá Wigan
AC Milan er búið að staðfesta félagaskipti Ricardo Rodriguez til PSV Eindhoven þar sem hann mun leika á láni út tímabilið. PSV hafði einnig áhuga á Patrick van Aanholt, bakverði Crystal Palace.
Theo Hernandez hrifsaði byrjunarliðssæti Rodriguez þegar hann gekk í raðir Milan fyrir tímabilið og vildi svissneski landsliðsmaðurinn komast burt til að fá meiri spiltíma, enda er EM framundan næsta sumar.
Rodriguez er 27 ára og á 67 leiki að baki fyrir Sviss. Hann spilaði næstum alla deildarleiki Milan fyrstu tvö tímabilin hjá félaginu en hefur aðeins fengið að spila fimm á þessari leiktíð.
Rodriguez er metinn á 10 milljónir evra og á eitt og hálft ár eftir af samningi sínum við Milan.
Antonee Robinson, vinstri bakvörður Wigan, er á leið til Milan til að fylla í skarðið. Milan greiðir um 7 milljónir punda fyrir Robinson sem gengst undir læknisskoðun og verður staðfestur á morgun.
Athugasemdir