,,Þeir létu okkur alveg vinna fyrir þessu og í raun og veru fengu þeir fullt af færum líka svo úrslitin hefðu getað verið hvernig sem er. En auðvitað var mjög gott að halda hreinu á móti þeim og setja þrjú," sagði Hannes Þ. Sigurðsson framherji FH eftir 0-3 sigur á Breiðablik í leik meistara meistaranna í kvöld.
,,Þetta eykur sjálfstraustið okkar til muna. Mér fannst við vera með ágætis tak á leiknum, það var góður talandi og vinnslan var mjög góð."
,,Það er gaman að fá að taka þátt í að vinna loksins medalíu. Ég er ekki búinn að vinna mikið af þeim síðasta áratuginn svo það er gott að koma heim og kynnast því aðeins. Við tókum 1. deildina árið 2000 og þá held ég að ég hefi fengið medalíu, en það er ekkert til að monta sig af, ein medalía."
Hannes hóf feril sinn með FH en fór frá félaginu árið 2002, skömmu áður en liðið vann sinn fyrsta titil sem var deildabikarinn það ár. Eftir það hefur liðið unnið deild eða bikar á hverju ári frá 2004.
,,Ég missti alveg af því og er búinn að hlusta á það bara á netinu. Það er gott að kynnast þessu strax svona fljótlega og fá þennan anda í hópinn að við séum að vinna og þetta séu mikilvægir leikir."
Nánar er rætt við Hannes í sjónvarpinu hér að ofan þar sem hann ræðir um líkamlegt form sitt sem hann telur sig þurfa að bæta til að komast í byrjunarliðið.
