Davíð Smári stýrði Vestra til sigurs í Mjólkurbikarnum.
„Ég er ekki kominn svo langt, ég verð fyrst að ná þessari súru mjólkurlykt af mér, en strákarnir fá aðeins að skemmta sér í kvöld," sagði Davíð Smári Lamude, þjálfari Vestra, aðspurður um hvernig liðið skyldi fagna í kvöld eftir fyrsta bikarsigur í sögu félagsins.
Lestu um leikinn: Valur 0 - 1 Vestri
Vestri vann 1-0 sigur á Val fyrr í kvöld á Laugardalsvelli í úrslitaleik Mjólkurbikarsins. Jeppe Pedersen leikmaður Vestra skoraði stórkostlegt mark sem skildi liðin að um miðbik fyrri hálfleiks.
„Ég er ekki alveg með orðin fyrir þig. Ég er ofboðslega stoltur og glaður fyrir hönd strákanna og fólkið í stúkunni að geta boðið þeim upp á þessar minningar. Ég er búinn að segja það alla vikuna, við getum búið til eitthvað sérstakt hér í dag. Einhverjar minningar sem munu ekki gleymast og við gerðum það."
Hvað skildi liðin að í dag?
„Agi, vinnusemi, hugrekki og dugnaður, allt sem Vestraliðið stendur fyrir. Það má bæta í þetta dass af heppni, það er ekkert hægt að horfa framhjá því."
Það eru ekki margir sem hefðu spáð þessu fyrir mót.
„Uppgangur liðsins hefur verið gríðarlega mikill, það er ekki út af mér. Ég er fyrir það fyrsta þakklátur stjórn Vestra að þora að ráða mig, ég er þeim ofboðslega þakklátur fyrir það, og hvað það er lagt í liðið. Það eru allir saman í liði að róa í sömu átt."
Viðtalið má sjá í heild sinni í spilaranum hér að ofan.
Athugasemdir
