Philip Billing, leikmaður Bournemouth, er á leið aftur heim til Danmerkur en hann er að ganga í raðir Midtjylland. Sky Sports greinir frá.
Billing, sem eyddi síðustu leiktíð á láni hjá Napoli, er ekki í framtíðaráhorfum Bournemouth og hefur verið tjáð að hann megi fara í þessum glugga.
Sky segir hann ætla að samþykkja það, en hann er í viðræðum um að ganga í raðir Midtjylland.
Danska félagið mun greiða um fimm milljónir punda fyrir þennan 29 ára gamla miðjumann.
Billing er uppalinn hjá Esbjerg en fór ungur að árum til Huddersfield Town á Englandi. Árið 2019 gekk hann í raðir Bournemouth fyrir 14 milljónir punda.
Íslenski landsliðsmarkvörðurinn Elías Rafn Ólafsson er á mála hjá Midtjylland sem situr í 2. sæti dönsku úrvalsdeildarinnar. Daníel Freyr Kristjánsson er einnig á mála hjá Midtjylland, en er sem stendur á láni hjá Fredericia.
Hann á að baki 5 A-landsleiki með Dönum, en ekkert spilað síðustu tvö ár.
Athugasemdir
