Jón Ólafur Daníelsson þjálfari ÍBV var að vonum svekktur með 2-1 tap sinna stúlkna gegn Stjörnunni í kvöld.
„Það eru náttúrulega alltaf vonbrigði að tapa en þetta var bara hörkuleikur og allir lögðu sig fram. En tvenn skelfileg varnarmistök verða til þess að við töpum í dag,“ sagði Jón Ólafur við Fótbolta.net eftir leikinn.
„Mér fannst fyrri hálfleikurinn frábær en í seinni hálfleik missum við einhvern veginn dampinn í þessu og mér fannst það skína svolítið að Stjarnan kann á þennan völl. Þetta er svona eins og malbik, það er engin motta á þessu, þannig að boltinn skoppar öðru vísi en annars staðar, og þær kunna að nýta sér það. En við létum þær leggjast full hart á okkur.“
ÍBV hefur einungis fengið 1 stig úr síðustu tveimur leikjum eftir að hafa unnið allt framan af, en Jón Ólafur segir liðið þó ekki vera á niðurleið.
„Dampurinn er alls ekki að fara af þessu. Mér fannst mínar stelpur berjast alveg til fyrirmyndar í dag og við hefðum getað verið 2-0 yfir í hálfleik, Kristín Erna fékk náttúrulega svakalegt færi, og í stöðunni 2-1 fær Hlíf alveg dauðafrían skalla til að jafna 2-2, en að tapa hérna 2-1, það getur og það mun koma fyrir alla,“ sagði hann.
Viðtalið má sjá í heild sinni hér að ofan.
