Hangeland er hér í baráttunni við Veigar Pál.
Brede Hangeland fyrirliði Noregs var að vonum sáttur með 2-1 sigur liðsins gegn Íslandi á Laugardalsvelli í dag. Hann var þó ekki alls kostar sáttur með frammistöðuna og hrósaði hann íslenska liðinu.
„Þetta var mjög mikilvægur sigur. Mér fannst við ekki spila vel en Ísland spilaði mjög vel, sérstaklega í fyrri hálfleik. En við náðum sigrinum og það er það sem mestu máli skiptir,“ sagði Hangeland við Fótbolta.net eftir leikinn.
Aðspurður hvort að sigur Norðmanna hefði verið verðskuldaður, svaraði Hangeland: „Það er erfitt að segja, mér fannst þeir fá færi og þeir hefðu kannski átt að fá víti í fyrri hálfleik. En við fengum tvö til þrjú mjög góð færi til að koma þessu í 3-1, en ég er ekki viss. En hverjum er ekki sama, við unnum leikinn.“
„Þetta var mjög mikilvægur sigur. Við vildum byrja vel en eins og ég sagði, þá vorum við ekki ánægðir með spilamennskuna, en þegar uppi er staðið náðum við þremur stigum og það er betra en að spila vel.
Hangeland valdi einmitt þennan leik til að skora sitt fyrsta landsliðsmark, og var hann ánægður með það.
„Það er gaman að skora mark, nú getur enginn sagt að ég hafi ekki skorað fyrir landsliðið. Það besta við markið er að það hjálpaði okkur að vinna leikinn.“
Hangeland ræddi einmitt um komandi tímabil hjá Fulham og má sjá það hér fyrir ofan.
