Landsliðskonan Sveindís Jane Jónsdóttir segir íslenska landsliðið spennt fyrir komandi heimaleik gegn Úkraínu og telur leikinn geta hentað liðinu vel.
„Bara spennandi, alltaf gaman að koma til Íslands og spila fyrir framan sitt fólk. Mjög spenntar fyrir leikjunum og erum auðvitað byrjaðar að æfa okkur fyrir Úkraínu leikinn, þar sem hann er fyrstur,“ sagði Sveindís þegar Fótbolti.net ræddi við hana.
Að hennar sögn eru verkefnin tvö fram undan ólík, en leikurinn gegn Úkraínu sé sérstaklega spennandi fyrir íslenska liðið.
„Þetta eru tveir frábærir leikir fyrir okkur og tveir ólíkir leikir. Úkraína er svona aðeins sá leikur sem við erum spenntastar fyrir. Þar sem vonandi getum við haldið aðeins betur í boltann og spilað þann bolta sem að við viljum gera.“
„Úkraína er alveg frábært lið þannig að ég held að þetta verði bara hörkuleikur og hörku jafn leikur líka.“
Hún bendir á að úkraínska liðið hafi sýnt styrk sinn gegn sterkustu þjóðum riðilsins.v
„Þær gerðu fínt á móti Englandi og Spáni. Þær skora á móti báðum liðum, þannig að við þurfum að vera vakandi fyrir þeirra skyndisóknum og bara þeirra leik.“
„Þær eru mjög beinskeyttar og að skora á móti Englandi og Spáni er ekkert auðvelt, ég meina við gerðum það ekki. Þær fá ekki mörg færi á móti þeim en skora samt, þannig þetta er bara hörkugott lið.“
„Við þurfum að vera vakandi fyrir því sem þær ætla að gera en spila okkar leik og skora einhver mörk.“
Og markmiðið er skýrt:
„Við viljum auðvitað skora mörk og það ætlum við að gera á móti Úkraínu.“
Sveindís segir að liðið geti einnig tekið jákvæða hluti með sér úr síðasta landsliðsglugga, þar sem Ísland mætti Spáni og Englandi.
„Þetta voru tveir mjög erfiðir leikir á móti bara tveimur bestu liðum heims.“
„Getum tekið það með okkur að við vitum að við getum varist bestu leikmönnum heims. Svo líka bara baráttan í okkur og hvað við gefumst aldrei upp, bara frábært og við getum tekið það með okkur.“
Að lokum segir hún stuðninginn úr stúkunni skipta miklu máli og skilaboðin til stuðningsmanna eru einföld:
„Það bara breytir öllu, að fá okkar fólk og fá Íslendinga í stúkuna er alltaf bara frábært.“
„Bara mæta, komið og horfið á okkur vinna Úkraínu og komið svo líka á næsta leik eftir það.“
Sjáðu viðtalið í heild í spilaranum hér að ofan.
