England: Brentford nýtti færin gegn Liverpool

Brentford og Liverpool áttust við í eina leik kvöldsins í ensku úrvalsdeildinni á Gtech Community Stadium í Brentford.

Liverpoool var mun meira með boltann og byrjaði betur en það var Brentford sem skoraði fyrsta markið. Eftir hornspynru frá Brentford fékk Ibrahima Konate boltann í sig og hann fór þaðan í netið.

Yoane Wissa bætti öðru marki við stuttu fyrir lok fyrri hálfleiks en rétt áður hafði hann átt skot sem fór í Ben Mee og í netið en Mee var í rangstöðunni og markið því dæmt af. 2-0 var staðan í hálfleik.

Jurgen Klopp stjóri Liverpool var eðlilega ekki sáttur með gang mála og gerði þrefalda skiptingu í hálfleik.

Liverpool menn komu sterkir inn í síðari hálfleikinn og Darwin Nunez kom boltanum í netið eftir þriggja mínútna leik í þeim síðari en aftur var mark dæmt af vegna rangstöðu.

Það liðu þó aðeins tvær mínútur áður en Alex Oxlade-Chamberlain skallaði boltann í netið og minnkaði muninn eftir fyrirgjöf frá Trent Alexander-Arnold.

Liverpool reyndi hvað þeir gátu að jafna metin en það var Bryan Mbeumo sem skoraði sigurmarkið með fyrsta skoti Brentford á markið í síðari hálfleik á 84. mínútu en hann vann Konate í baráttunni um boltann.