Það er ljóst að Alisson markvörður Liverpool mun ekki spila með liðinu á næstunni vegna meiðsla.
Hann hefur misst af síðustu fimm leikjum liðsins og er ekki byrjaður að æfa. Hann ferðaðist ekki með liðinu til Lundúna á úrslitaleik deildabikarsins og var því ekki með í fögnuði liðsins eftir sigur á Chelsea.
Jurgen Klopp stjóri liðsins er þó bjartsýnn að hann muni snúa aftur áður en tímabilinu lýkur.
„Það er engin tímasetning á þessu en þetta eru slæm vöðvameiðsli. Leikmenn jafna sig mishratt, þetta eru engin smávægileg meiðsli. Við verðum að bíða í nokkrar vikur í viðbót. Hann er í ræktinni en ekki kominn út á völl," sagði Klopp.
„Þetta eru nokkuð slæm meiðsli en tímabilinu er ekki lokið hjá honum."
Athugasemdir