Ítalíumeistarar AC Milan eru búnir að bjóða í Alessandro Florenzi, hægri bakvörð AS Roma sem spilaði að láni hjá Milan á síðustu leiktíð.
Florenzi er 31 árs og á aðeins eitt ár eftir af samningi sínum við Roma.
Florenzi, sem getur einnig spilað á hægri kanti, býr yfir mikilli reynslu. Hann á 280 leiki að baki fyrir Roma, 36 fyrir PSG og þá varð hann Evrópumeistari með ítalska landsliðinu í fyrra.
Milan getur keypt Florenzi fyrir 4,5 milljónir evra vegna ákvæðis í lánssamningnum en vill ekki borga svo mikið fyrir leikmanninn. Þess í stað bauð félagið 2,5 milljónir fyrir hann og er í viðræðum við Roma.
Þá er hollenski varnarmaðurinn Sven Botman vongóður um að ganga í raðir Milan, þar sem hann væri í samkeppni við Fikayo Tomori og Pierre Kalulu um sæti í byrjunarliðinu.
Botman er 22 ára og á þrjú ár eftir af samningi sínum við Lille, sem vill 50 milljónir evra fyrir hann. Það gæti reynst alltof mikið fyrir Milan.
„AC Milan? Við erum að vinna í því. Það er erfitt fyrir mig að hugsa ekki um félagaskiptin því ég er alltaf að heyra eitthvað um þau á hverjum degi," sagði Botman.
„Hjólin eru að snúast og vonandi kemur meira í ljós fyrir undirbúningstímabilið."
