Ísak Snær Þorvaldsson leikmaður Breiðabliks mun yfirgefa félagið eftir tímabilið en hann er búinn að skrifa undir samning við norska félagið Rosenborg.
Ísak lagði upp sigurmark Breiðabliks gegn KA í dag sem Jason Daði Svanþórsson skoraði. Fótbolti.net ræddi við Óskar Hrafn Þorvaldsson þjálfara Breiðabliks og spurði hann út í mál Ísaks.
„Hann er búinn að tækla það mjög vel, auðvitað væri hann til í að vera búinn að skora fleiri mörk í undanförnum leikjum. Hann er gríðarlega mikilvægur fyrir okkur og hefur verið frábær," sagði Óskar.
„Ég hef ekki séð að hann hafi verið að missa einbeitingu eða höfuðið á honum að fara í einhverjar áttir. Hann fór til Noregs í vikunni og kláraði sín mál þar. Það eru allir ánægðir fyrir hans hönd, hann er búinn að vera virkilega góður í sumar, búinn að leggja mikið á sig. Hann veit að það er hellings helvítis vinna eftir."
Óskar segir að Ísak veit að hann þurfi að leggja mikið á sig til að standa sig hjá eins stóru félagi og Rosenborg er. Hann hefur trú á því að hann muni gera það.
„Ég hef bullandi trú á Ísaki, hann þarf að læra að lifa eins og atvinnumaður og þá eru honum allir vegir færir og þakið mjög hátt hjá honum," sagði Óskar.
