Kanadamaðurinn Alphonso Davies á það á hættu að missa af HM vegna meiðsla sem hann varð fyrir í leik Bayern gegn PSG í undanúrslitum Meistaradeildarinnar í vikunni.
Davies meiddist aftan í læri og mun ekki spila meira með Bayern en þýska félagið segir að hann verði frá næstu vikurnar.
Hann vonast að sjálfsögðu eftir því að vera í landsliðshópi Kanada á HM sem fram fer í heimalandinu. Liðið mætir Bosníu í fyrsta leik 12. júní. Kanadíska fótboltasambandið sendi frá sér yfirlýsingu í kjölfar meiðslanna.
„Við erum í nánum samskiptum við Alphonso og verðum áfram í sambandi við læknateymi Bayern eftir þetta bakslag. VIð einbeitum okkur að því að styðja hann í bataferlinu og veita honum allar tiltækar auðlindir, þar á meðal sérhæfða þekkingu á mjúkvefjum, til að veita honum bestu mögulegu leið til að ná fullum bata fyrir HM.“
