Guðmundur Tyrfingsson er aftur kominn hem í Selfoss en hann kemur til uppeldisfélagsins frá ÍA.

Hann var kynntur á samfélagsmiðlum Selfyssinga og sést þar mæta á rútu frá fjölskyldufyrirtækinu.

Guðmundur er 19 ára gamall sóknarmiðjumaður sem vakti athygli með Selfossi í 2. deildinni áður en hann gekk í raðir ÍA um mitt sumar 2020. Hann á fjölmarga leiki fyrir yngri landslið Íslands.

Hann fékk ekki að spila eins mikið með Skagamönnum og vonir höfðu verið um. Hann hefur komið við sögu í níu leikjum í Bestu deildinni í sumar, en í öllum nema einum sem varamaður.

Selfoss er sem stendur í öðru sæti Lengjudeildarinnar og vonast til að spila í deidl þeirra bestu á næsta tímabili.