Bayern München vann síðasta leik sinn fyrir HM í Katar er það lagði Schalke að velli, 2-0. Eric Maxim Choupo-Moting skoraði annað mark Bayern, en sá hefur verið heitur fyrir framan markið á tímabilinu.

Schalke gerði heiðarlega tilraun til þess að halda hreinu í fyrri hálfleiknum. Liðið var meira að segja nálægt því að taka forystuna en Manuel Neuer bjargaði í tæka tíð.

Choupo-Moting átti þá tilraun í stöng stuttu síðar áður en Serge Gnabry braut ísinn. Jamal Musiala átti laglega hælsendingu á Gnabry sem skoraði með góðu skoti.

Það var svo strax í byrjun síðari hálfleik sem Choupo-Moting bætti við öðru. Musiala og Gnabry spiluðu vel sín á milli áður en Musiala kom honum á Choupo-Moting sem skilaði boltanum í netið. Ellefta mark hans í sextán leikjum í öllum keppnum og mætir hann því vel heitur fyrir HM í Katar.

Bayern er á toppnum með 34 stig, átta stigum meira en Leipzig sem er í öðru sæti.