Sænska deildartímabilinu er lokið í kvennaflokki þar sem nokkrar íslenskar fótboltakonur stóðu sig feykilega vel.
Tvær þeirra hafa verið tilnefndar til verðlauna eftir tímabilið og fer verðlaunaafhendingin fram núna á fimmtudagskvöldið.
Guðrún Arnardóttir kemur til greina sem besti varnarleikmaður ársins í efstu deild sænska boltans, þar sem hún lék lykilhlutverk í meistaraliði Rosengård sem gjörsamlega rúllaði deildinni upp.
Rosengård vann alla deildarleiki tímabilsins nema einn og fékk aðeins 9 mörk á sig í 25 leikjum.
Guðrún er ein af þremur sem koma til greina í valinu á varnarmanni ársins, ásamt liðsfélaga sínum Rebecca Knaak og Josefine Rybrink sem er á mála hjá BK Häcken.
Hlín Eiríksdóttir kemur þá til greina sem besti framherji ársins í efstu deild eftir að hafa endað sem næstmarkahæsti leikmaður deildarinnar.
Hlín skoraði 15 mörk og gaf 4 stoðsendingar fyrir Kristianstad, sem endaði í fjórða sæti. Momoko Tanikawa, í liði FC Rosengård, var sú eina sem skoraði meira á tímabilinu en hún spilar sem framsækinn miðjumaður og er því ekki í samkeppni við Hlín.
Hlín er í keppni við Cathinka Tandberg, úr liði Hammarby, og Olivia Holdt, úr liði FC Rosengård, í kjörinu um framherja ársins.
Athugasemdir
