Kári Árnason var stórkostlegur í vörn Víkinga í 3-2 sigri liðsins gegn Stjörnunni fyrr í kvöld þegar Víkingar heimsóttu Samsungvöllinn og sóttu 3 stig.
Lestu um leikinn: Stjarnan 2 - 3 Víkingur R.
„Þetta var bara hörkuleikur, örugglega gaman að horfa á þetta. Allavega skemmtilegra en að horfa á leikinn uppá Skipaskaga í 13 vindstigum og lágri sól.'' Sagði Kári kampakátur.
„Þetta var bara alvöru fótboltaleikur, það var jafnræði með liðunum en mér fannst við alveg eiga skilið að vinna þetta á endanum.''
Kári skallaði allnokkra bolta frá í leiknum, spurning hvort hann hafi engar áhyggjur af höfuðverk.
„Við Sölvi erum búnir að tala um það í mörg ár að við séum hræddir um minnisleysi þegar við erum orðnir 45 ára, við ætluðum að reyna að minnka þetta, en maður verður víst að skalla þetta í burtu þegar þetta kemur.''
Víkingar missa Sölva útaf eftir 12 mínútur, fannst Kára það riðla leikskipulagi Víkinga og hafa áhrif á taktíkina?
„Þetta var svolítið óþægilegt, Kalli er bakvörður að upplagi og hann er alltíeinu kominn í miðvörð, þá verður þetta svona svolítið skrítið í staðinn fyrir að vera með þrjá reynda hafsenta í þessu, jú ég get alveg fallist á það að þetta varð þægilegra í seinni hálfleik þegar við vorum komnir í fjögurra manna, við vorum mannaðir í það að vera með fjögurra manna línu.''
Viðtalið í heild sinni má sjá hér fyrir ofan en þar fer Kári nánar út í leikinn, tímabilið til þessa og fleira.
Athugasemdir
