Hákon Arnar var í byrjunarliði Lille sem gerði 1-1 jafntefli við Jose Mourinho og lærisveina hans í Fenerbahce.

Fyrri leiknum lauk með 2-1 sigri Lille en Fenerbahce tókst að jafna metin í einvíginu með því að komast í 1-0 í kvöld. Leikurinn var framlengdur og þar gerði Jonathan David markið sem kom Lille áfram, en það gerði hann úr vítaspyrnu á 109. mínútu.

Hákon fór af velli þegar átta mínútur voru búnar af framlengingunni en þetta þýðir að Lille er komið áfram og mætir næst Slavía Prag frá Tékklandi eða Union Saint-Gilloise frá Belgíu.

Elías Rafn Ólafsson var í marki Midtjylland sem gerði 1-1 jafntefli við Ferencvaros.

Markvörðurinn átti stórleik og var langbesti maður vallarins í Ungverjalandi. Hann átti einhverjar níu vörslur og var með einkunn upp á 8,8 hjá Fotmob.

Midtjylland mætir Slovan Bratislava í umspili, en sigurvegarinn mun fara í riðlakeppni Meistaradeildarinnar.

Valgeir Lunddal Friðriksson og hans menn í Häcken eru þá komnir í umspil um sæti í Sambandsdeildina eftir að hafa gert 1-1 jafntefli við eistneska liðið Paide. Häcken vann fyrri leikinn 6-1 og var því ekki í miklum vandræðum með að komast áfram.

Häcken spilar við þýska liðið Heidenheim í umspilinu.

Ágúst Eðvald Hlynsson var í byrjunarliðinu hjá AB Kaupmannahöfn sem vann 4-0 sigur á FB í danska bikarnum. Ægir Jarl Jónasson var ekki með AB í dag. Jóhannes Karl Guðjónsson er þjálfari liðsins.