Mbappe var ekki hluti af franska landsliðinu vegna meiðsla en hann ákvað því að skella sér til Stokkhólms ásamt vinum sínum. Fór hann út á lífið með þeim á meðan franska landsliðið spilaði.

Nú segir Aftonbladet að Mbappe sé sakaður um nauðgun sem átti sér stað á hóteli sem hann gisti á í Stokkhólmi. Hann sé sá sem lögregla er að rannsaka í tengslum við málið.

Mbappe steig fram í gær á samfélagsmiðlum og sagði þetta einfaldlega „falsfréttir".

En samkvæmt franska fjölmiðlamanninum Romain Molina - sem er með stóran hóp fylgjenda - þá hélt Real Madrid krísufund út af málinu. Mbappe gekk í raðir Madrídarstórveldisins í sumar en hann er eitt stærsta nafnið í fótboltaheiminum í dag.

Svo virðist sem það hafi verið ákveðið hjá Real að taka Mbappe út úr auglýsingum félagsins en hann var klipptur út úr auglýsingu Real Madrid og Adidas sem birtist í dag. Jude Bellingham, liðsfélagi Mbappe, birti mynd af auglýsingunni þar sem Mbappe er í henni, en hann eyddi henni síðar og uppfærði.

Þetta mál er á grunnstigi en eins og áður segir, þá neitar Mbappe sök.