Spánn: Sigurlaust Elche náði í fimmta jafnteflið

Cadiz og Elche mættust í eina leik kvöldsins í fallbaráttu spænska boltans og tóku heimamenn í Cadiz forystuna snemma leiks. Brian Ocampo skoraði þar sannkallað glæsimark eftir eigin hornspyrnu.

Boltinn barst aftur út til Ocampo sem plataði varnarmann upp úr skónum áður en hann þrumaði boltanum í samskeytin fjær, óverjandi fyrir markvörð gestanna. Þetta glæsilega mark má sjá með að smella hér.

Leikurinn var nokkuð jafn en gestirnir úr botnliði Elche voru hættulegir í síðari hálfleik og tókst að gera jöfnunarmark á 81. mínútu. Ezequiel Ponce var þar á ferð með frábærum skalla eftir flotta fyrirgjöf frá Lautaro Blanco.

Lokatölur 1-1 og er Elche áfram á botni deildarinnar með 5 stig. Cadiz er einnig í fallsæti, en þó með 16 stig eftir umferðirnar 17.