| fös 17. september 2021 13:33 |
|
Rosalegur þjálfarakapall í kortunum - Margar sögur í gangi
Það eru hræringar í þjálfaramálum.
Hver þjálfar FH á næsta tímabili?
Jón Þór Hauksson er víða á blaði.
Verða þjálfaraskipti í Kórnum?
Helgi Sigurðsson er orðaður við HK og Fjölni.
Magnús Már Einarsson er í umræðunni.
Hér má sjá samantekt Fótbolta.net um stöðu mála þar sem kryddað er með slúðursögum um það sem um er rætt.
Pepsi Max-deildin:
Breiðablik - Óskar Hrafn Þorvaldsson hefur gert frábæra hluti í Kópavoginum og verður þar líklega áfram en nafn hans ku vera á blaði erlendis, meðal annars í Danmörku.
Víkingur - Arnar Gunnlaugsson er á óuppsegjanlegum samningi í Fossvoginum. Þar eru menn í skýjunum með hans starf og hann talar ítrekað um hvað honum líður vel hjá félaginu.
KR - Rúnar Kristinsson er ósnertanlegur í Vesturbænum.
KA - Arnar Grétarsson er með samning út næsta tímabil hjá KA og mikil ánægja með vegferð liðsins undir hans stjórn. En Arnar er hinsvegar klárlega á blaði hjá félögum á höfuðborgarsvæðinu sem líklega reyna að lokka hann suður.
Valur - Staða Heimis Guðjónssonar hefur verið mikið í umræðunni en formaðurinn gaf það út að hann verði áfram. Ýmsar slúðursögur hafa verið í gangi, meðal annars um að Valur hafi kannað Heimi Hallgrímsson og að félagið væri að horfa út fyrir landsteinana en Börkur blæs á þær sögur.
FH - Ólafur Jóhannesson er með samning út tímabilið en mjög mikill vafi á því hvort samstarfið heldur áfram. Menn í Kaplakrika halda spilunum þétt að sér. Sögur hafa verið í gangi um að Davíð Þór Viðarsson gæti tekið við sem aðalþjálfari og einnig um að Heimir Guðjónsson sé á blaði ef hann verður látinn fara frá Val.
Stjarnan - Tvennum sögum fer af því hvort Þorvaldur Örlygsson verði áfram með Stjörnuna. Hann hefur sjálfur sagt að hann verði áfram. Það er uppbygging framundan í Garðabænum og hafa Arnar Grétarsson þjálfari KA, Jón Þór Hauksson þjálfari Vestra, Sigurður Heiðar Höskuldsson þjálfari Leiknis, Brynjar Björn Gunnarsson þjálfari HK og Ejub Purisevic núverandi aðstoðarmaður Þorvaldar verið nefndir.
Leiknir - Í Breiðholtinu er gríðarleg ánægja með Sigurð Heiðar Höskuldsson sem hefur náð eftirtektarverðum árangri og ljóst að stærri félög horfa til hans.
Keflavík - Umræða hefur verið um samvinnu Sigurðar Ragnars Eyjólfssonar og Eysteins Húna Haukssonar. Sögusagnir eru um að Eysteinn Húni hverfi mögulega á braut og Keflavík hætti í tveggja þjálfara kerfinu, Siggi Raggi fái þá nýjan aðstoðarmann og er Gunnar Einarsson orðaður við það starf.
HK - Sögusagnir eru um að þjálfaraskipti verði í Kórnum sama hver niðurstaða tímabilsins verði og Brynjar Björn Gunnarsson hverfa á braut. Helgi Sigurðsson er orðaður við stöðuna rétt eins og núverandi aðstoðarþjálfari, Viktor Bjarki Arnarsson. Jón Þór Hauksson og Rúnar Páll Sigmundsson.
Fylkir - Rúnar Páll Sigmundsson stýrir Fylki út tímabilið en hann sagðist í viðtali vera opinn fyrir því að skoða áframhald sama hver niðurstaðan yrði á tímabilinu. Fylkismenn eru líklegir til að reyna að halda Rúnari.
ÍA - Lítið heyrist frá Akranesi. Jóhannes Karl Guðjónsson vinnur að því að halda liðinu uppi og staðan verður svo væntanlega skoðuð að tímabilinu loknu.
Fram - Það er mikil gleði hjá Frömurum eftir að þeir endurheimtu sæti í efstu deild og í þeirra augum er Jón Sveinsson einfaldlega kóngurinn.
ÍBV - Margir eru orðaðir við þjálfarastöðu ÍBV eftir að Helgi Sigurðsson lét af störfum þrátt fyrir að koma liðinu upp í efstu deild, hér má sjá tíu nöfn sem hafa verið í umræðunni en einnig eru Sigurður Heiðar Höskuldsson og Magnús Már Einarsson þjálfari Aftureldingar á blaði Eyjamanna.
Lengjudeildin:
Fjölnir - Grafarvogsliðinu mistókst að komast upp og Ásmundur Arnarsson, sem er sterklega orðaður við kvennalið Breiðabliks, er að hætta. Hávær orðrómur er um að Fjölnir haldi áfram að leita til góðkunningja og Ágúst Gylfason snúi aftur. Helgi Sigurðsson og Eiður Benedikt Eiríksson hafa líka verið orðaðir við starfinu.
Kórdrengir - Davíð Smári Lamude hefur gert frábæra hluti með Kórdrengina og eftir frábært sumar gerir hann aðra tilraun á næsta ári til að koma liðinu upp.
Grótta - Ágúst Gylfason er að hætta með Gróttu. Bretinn Christopher Arthur Brazell sem starfar í þjálfun yngri flokka félagsins er orðaður við starfið, einnig hafa Brynjar Björn Gunnarsson og Rafn Markús Vilbergsson verið nefndir.
Vestri - Vestramenn vilja ólmir halda Jóni Þóri Haukssyni, algjört forgangsatriði hjá félaginu en hann er á blaði víða. Liðið stefnir á að fara upp að ári og vanda þarf valið ef Jón heldur ekki áfram.
Grindavík - Sigurbjörn Hreiðarsson náði ekki markmiði sínu í Grindavík og lætur af störfum. Alfreð Elías Jóhannsson hefur verið sterklega orðaður við stöðuna, Rafn Markús Vilbergsson og Magnús Már Einarsson hafa einnig verið nefndir.
Selfoss - Eftir erfiðleika framan af tímabili þá fóru Selfyssingar á almennilegt skrið í lokin. Sagan segir að Selfyssingar ætli að halda áfram að sýna Dean Martin traustið og áætlunin sé að styrkja liðið með breskum leikmönnum á næsta tímabili.
Afturelding - Samningur Magnúsar Más Einarssonar rennur út eftir tímabilið og önnur félög horfa til hans.
Þór - Enn og aftur eru Þórsarar í þjálfaraleit en illa gengur hjá félaginu að ná upp stöðugleika. Jóhann Kristinn Gunnarsson þjálfari Völsungs, Sveinn Þór Steingrímsson þjálfari Magna, Halldór Jón Sigurðsson betur þekktur sem Donni, Magnús Már Einarsson, Úlfur Blandon og Jón Stefán Jónsson eru nöfnin sem hafa heyrst í umræðunni.
Þróttur - Þróttarar eru fallnir í 2. deild og óvíst hvort Guðlaugur Baldursson haldi áfram.
Víkingur Ólafsvík - Guðjón Þórðarson gerði tveggja ára samning við Ólsara og fær það verkefni að koma liðinu upp.
Athugasemdir
Nýjustu fréttirnar
13:30
