Benzema, sem vann gullboltann rétt fyrir HM, meiddist stuttu fyrir mótið og var það Deschamps sem tók ákvörðun um það að hann myndi yfirgefa hópinn og reyna að ná sér að fullu.

Deschamps neitaði að velja annan mann inn í hópinn fyrir Benzema og hefur gengið ágætlega án hans. Frakkar eru komnir í úrslit og er Olivier Giroud og Kylian Mbappe að ná vel saman í fremstu víglínu.

Benzema náði sér af meiðslunum og hefur verið að æfa með Real Madrid að undanförnu, en hann gæti verið í hópnum í úrslitaleiknum samkvæmt hinum ýmsu frönsku miðlum.

Libertal Digital segir að samband Benzema og Deschamps sé ekki gott hins vegar. Deschamps var spurður út í það eftir leikinn gegn Marokkó hvort Benzema gæti verið með í úrslitaleiknum og neitaði hann að tjá sig um það.

Benzema er ósáttur við meðferðina sem hann hefur fengið. Hann vildi meðal annars vera áfram með Frökkum á HM en Deschamps sendi hann frekar heim.

Framherjinn birti mynd af sér á Instagram og skrifaði hann undir myndina „Ég hef ekki áhuga,“ , en það vekur upp margar spurningar.

Þá birti hann einnig mynd af sér og Zinedine Zidane, fyrrum þjálfara Real Madrid og bauð góða nóttina, en Zidane hefur hafnað boði franska knattspyrnusambandsins um að vera viðstaddur úrslitaleikinn á sunnudag og gæti það gefið vísbendingar um að Benzema verði ekki í Katar er úrslitaleikurinn fer fram.