Aron Einar á landsliðsæfingu á Spáni í dag.
Það er ekki á stefnuskrá Arons að spila með Þór í sumar.
Aron Einar Gunnarsson er í landsliðshópnum sem býr sig undir komandi leiki gegn Kósovó. Hann ræddi við Fótbolta.net í dag og var um nóg að tala við Aron. Hann fékk fyrst spurningu um stöðuna á sér líkamlega.
„Standið er mjög gott, mér líður vel í líkamanum og það er hungur í mér. Ég er klár í bátana og til í að gera allt til að landa sigri. Það er það sem ég er að einbeita mér að," segir Aron sem er klár í leikina tvo.
Hann segir tempóið hafa verið hátt á æfingum og alveg ljóst að menn vilja sýna sig og sanna fyrir nýjum landsliðsþjálfara, Arnari Gunnlaugssyni.
„Hann hefur komið mjög skemmtilega inn og ég hef rætt vel og mikið við hann um næstu skref og er virkilega spenntur."
„Standið er mjög gott, mér líður vel í líkamanum og það er hungur í mér. Ég er klár í bátana og til í að gera allt til að landa sigri. Það er það sem ég er að einbeita mér að," segir Aron sem er klár í leikina tvo.
Hann segir tempóið hafa verið hátt á æfingum og alveg ljóst að menn vilja sýna sig og sanna fyrir nýjum landsliðsþjálfara, Arnari Gunnlaugssyni.
„Hann hefur komið mjög skemmtilega inn og ég hef rætt vel og mikið við hann um næstu skref og er virkilega spenntur."
Aron er tvímælalaust einn besti landsliðsmaður íslenskrar fótboltasögu en valið á þessari goðsögn á þessum tímapunkti hefur verið nokkuð umdeilt þar sem hann hefur ekki verið að spila mikið. Í skoðanakönnun Fótbolta.net sögðust 59% ekki vera sammála valinu.
„Það mega allir hafa skoðun á valinu. Landsliðsvalið hefur alltaf verið á milli tannana á fólki á Íslandi og það er bara eðlilegt. Maður er bara mættur til að sýna sig og sanna og er ekki að stressa mig á því sem fólk hefur að segja. Eftir að hafa verið lengi frá lítur maður öðruvísi á íþróttina sjálfa og ég ber meiri virðingu fyrir íþróttinni. Ég sá góðan vin minn Aron Pálmars tala um það sama með handboltalandsliðinu í janúar. Mér hefur liðið nákvæmlega eins. Ég ætla að gefa allt eins og ég hef gert í alla 104 landsleikina sem ég hef spilað."
Aron Einar staðfestir að hann sé í þessum hópi núna sem miðvörður.
„Já. Við erum ekki með marga varnarmenn og það gefur kannski augaleið. Ég get spilað báðar stöður og er klár í það en er hugsaður sem miðvörður í þessu verkefni."
Stefnan að vera áfram úti
Aron er hjá Al-Gharafa í Katar en er ekki skráður í leikmannahóp liðsins í katörsku deildinni, vegna útlendingakvóta, en hefur spilað með liðinu í Meistaradeild Asíu. Hvernig eru gæðin í þeirri keppni?
„Við höfum verið að spila við lið frá Sádi-Arabíu. Þar er tempó og manni leið eins og maður væri að spila gegn hágæða Evrópuliðum. Góð taktík, fótboltaleikir með hágæða leikmenn. Það eru leikmenn í Sádi sem ættu að vera að spila áfram í Evrópu," segir Aron.
Hann vonast eftir því að fá áframhaldandi samning úti og er ekki á áætlun hans að spila á Íslandi í sumar.
„Við sjáum hvernig staðan þróast. Ég skynja að það sé verið að breyta reglum í Katar og fjölga erlendum leikmönnum. Leiðinlega staðan núna er að geta ekki spilað í deildinni vegna útlendingakvóta en spila í Meistaradeild Asíu. Þeir ætla vonandi að breyta reglunum því það eykur mína möguleika. Ég stefni á að vera áfram úti, ég ætla ekki heim í sumar."
Verður Aron semsagt ekki í treyju Þórs í sumar?
„Eins og staðan er í dag er það ekki planið. Það getur breyst eins og allt annað," segir Aron og þakkar Þór fyrir að hafa komið ferli sínum aftur í gang síðasta sumar. Hann segir að vera sín hjá liðinu hafi gefið sér mikið.
Ætlar aftur á HM
Í haust hefst undankeppni HM og Aron er með það markmið að spila í henni og hjálpa Íslandi að komast alla leið í lokakeppnina sem fer að stærstum hluta fram í Bandaríkjunum.
„100%. Til þess þarf ég að vera úti og spila á háu tempói. Ég átta mig á því. Ég ætla að taka þátt í undankeppni HM og komast á HM," segir Aron Einar.
Orri á framtíðina fyrir sér sem fyrirliði Íslands
Orri Steinn Óskarsson er nýr fyrirliði eftir að Arnar Gunnlaugsson tók við. Aron segist hafa stutt þessa ákvörðun frá byrjun og segir jákvæða þróun að yngri leikmenn taki nú meiri ábyrgð.
„Fyrirliðabandið er komið á Orra, þeir fá aukna ábyrgð og ég held að það sé virkilega góð þróun. Þeir fá meira sjálfstraust og ég tel að þeir séu algjörlega tilbúnir í það. Maður sér það í leikjum og á æfingum,"
„Ég var alveg hlynntur þessari ákvörðun frá byrjun. Ég er á svæðinu til að miðla af minni reynslu og mér finnst það góð þróun. Alveg sama hvað Orri er gamall, hann er jarðbundinn strákur sem á framtíðina fyrir sér sem fyrirliði Íslands. Ég held að hann eigi eftir að standa sig fáránlega vel í því," segir Aron.
Að lokum var Aron spurður út í komandi leiki gegn Kósovó.
„Við eigum að vinna þá en þeir eru með flinka leiki sem geta klárað leiki. Hjá okkur skiptir mestu máli að bæta okkur en auðvitað verðum við að halda okkur í B-deildinni, fá betri leiki og erfiðari andstæðinga. Ætlunin er að halda sér í B-deildinni."
Athugasemdir
