Gunnar Magnús Jónsson þjálfari Keflavíkur
„Þetta voru bara gríðarleg vonbrigði með úrslitin að sjálfsögðu sem og frammistöðuna og hvernig stelpurnar komu til leiks. Ég er bara virkilega svekktur með það.“ Sagði auðsjáanlega svekktur þjálfari Keflavḱur Gunnar Magnús Jónsson eftir 3-1 tap Keflavíkur gegn Þór/KA í Keflavík fyrr í dag.
Lestu um leikinn: Keflavík 1 - 3 Þór/KA
Eftir nokkuð jafnfræði framan af fyrri hálfleik komst Þór/KA yfir eftir skelfileg mistök í öftustu línu Keflavḱur. Vont fyrir heimakonur þar sem tilfinning fréttaritara úr stúkunni var sú að það lið sem yrði fyrra til að skora væri líklegast að fara að vinna leikinn.
„Ég er alveg fullkomnlega sammála því og þetta snerist svolítið um það. Það var ekkert að gerast í fyrri hálfleik og lítið eftir og við vorum bara að reyna að komast inn í hálfleikinn og endurskipuleggja okkur með vindinn í bakið í seinni hálfleik. Mörk er svo alltaf ódýr en þetta fyrsta mark sem við gáfum þeim var bara snemmbúin jólagjöf og gerði svolítið út um leikinn. “
Þrátt fyrir tapið er Keflavík ennþá með örlög sín í eigin höndum og er þegar þetta er skrifað með 4 stiga forskot á lið Aftureldingar sem á þó eftir að mæta Breiðablik í Kópavogi í kvöld.
„Þetta snýst bara um að hugsa um okkur og við verðum bara að taka hvern leik fyrir sig og reyna að hala inn stigum. Vissulega á Afturelding eftir erfitt prógram en við erum búin að sjá að í fótbolta getur allt gerst og við erum hvergi nærri hólpin.“
Sagði Gunnar en allt viðtalið má sjá hér að ofan.
