Beta og Glódís tilnefndar í Svíþjóð

Uppskeruhátið sænsku úrvalsdeildarinnar verður haldin á sunnudag og eru tveir Íslendingar tilnefndir til verðlauna. Það eru þær Elísabet Gunnarsdóttir og Glódís Perla Viggósdóttir.

Elísabet sem þjálfar Kristianstad er tilnefnd sem þjálfari ársins. Hún stýrði liðinu í 3. sæti deildarinnar sem tryggir liðinu sæti í Meistaradeildinni á næstu leiktíð.

Glódís er tilnefnd sem besti varnarmaður deildarinnar. Hún lék allar mínútur í liði Rosengård sem endaði í 2. sæti deildarinnar.

Elísabet var valin þjálfari ársins árið 2017 og var í 2. sæti árið 2012.