Heimir gefur skipanir á æfingu í Abu Dhabi í morgun.
,,Menn eru auðvitað svolítið þreyttir eftir langt ferðalag. Það voru tvær æfingar í gær og ein frekar létt æfing í dag. Það eru allir heilir," sagði Heimir Hallgrímsson annar af þjálfurum íslenska landsliðsins eftir æfingu liðsins í Abu Dhabi í morgun.
Ísland mætir Svíþjóð í vináttuleik klukkan 16:00 á morgun en leikurinn verður í beinni á Stöð 2 Sport. Ekki er um alþjóðlegan leikdag að ræða og því verður liðið talsvert breytt frá því í undankeppni HM.
,,Fyrst og fremst viljum við sjá þessa stráka. Leikirnir árið 2013 gáfu ekki tækifæri á að vera með einhverja tilraunastarfsemi."
,,Þetta er gott tækifæri að gefa þeim tækifæri að spila sem voru alltaf í hópnum en spiluðu lítið. Síðan eru líka ungir nýliðar hérna sem verður spennandi að sjá. Þeir hafa ekki skemmt fyrir sér í ferðinni hér," sagði Heimir en margir leikmenn í hópnum eru nýbyrjaðir á æfingum á undirbúningstímabilinu í Norðurlöndunum.
,,Við búumst ekki við einhverum sambabolta en aðalmálið er að fá það fram í leiknum sem við erum að reyna að gera. Aðalmálið er að menn séu meðvitaðir um það."
,,Við reynum að fara í okkar formúlu fyrir alla leiki og spila okkar taktík. Ef þessir strákar verða kallaðir inn í hóp seinna meir þá er sú vinna búin, þeir vita að hverju þeir ganga. Þeir vita líka hvernig við viljum hafa þetta í ferðunum og þeir ganga að því ef og þegar þeir verða valdir."
Hér að ofan má sjá viðtalið í heild sinni en það kemur frá KSÍ.
Athugasemdir
