88 dagar í fyrsta leik Íslands á HM
„Ég vil hrósa Íslendingum gríðarlega mikið fyrir þann fjölda fótboltamanna sem þjóðin býr til," sagði Sam Allardyce, stjóri Everton, í viðtali við Fótbolta.net á dögunum.
Sam er í dag stjóri Gylfa Þórs Sigurðssonar hjá Everton en á sínum tíma spiluðu Guðni Bergsson og Eiður Smári Guðjohnsen undir stjórn hans hjá Bolton. Sam segir magnað að sjá hvað margir öflugir leikmenn hafa komið frá Íslandi í gegnum tíðina.
„Allir á Íslandi ættu að vera mjög stoltir af þvo að búa til svona marga hæfileikaríka leikmenn sem spila í Evrópu sem og að komast á HM á þessu ári," sagði Sam við Fótbolta.net.
Sam hefur líkt og margir aðrir hrifist af árangri íslenska landsliðsins undanfarin ár og hann hrósar Heimi Hallgrímssyni sérstaklega fyrir hans þátt.
„Liðið hefur verið frábærlega skipulagt hjá þjálfaranum (Heimi Hallgrímssyni). Hann hefur leyft hæfileikunum í liðinu að njóta sín og ekki látið veikleikana koma í ljós. Leikmenn styðja hvorn annan og andrúmsloftið í liðinu er frábært sem hjálpar þeim þegar liðið spilar gegn öðrum liðum sem eru hæfileikaríkari. Liðsandinn og ástríðan er mikil hjá öllum leikmönnum og þjálfurum íslenska landsliðsins."
Sam segir að gengi Íslands á HM í sumar velti mikið á fyrsta leiknum gegn Argentínu í Moskvu þann 16. júní.
„Þetta veltur á því hvernig liðið byrjar. Þetta veltur mikið á fyrsta leiknum og hvernig úrslitin verða þar. Það gefur mikla vísbendingu því það skiptir ekki máli hverjum þú mætir á HM, það er erfitt að ná sigri í öllum leikjum," sagði Sam að lokum.
Sjá einnig:
Sam Allardyce í einkaviðtali um Gylfa
Athugasemdir
