Arnar Gunnlaugsson segir að leiðinlegt sé að þátttöku Víkinga í Lengjubikarnum sé lokið og nú þurfi að skipuleggja æfingaleiki. Víkingur tapaði fyrir Keflavík í vítaspyrnukeppni í 8-liða úrslitum í gærkvöldi.
Víkingur komst í 3-1 í leiknum í gær en að sögn Arnars varð kæruleysi til þess að Keflavík jafnaði í 3-3.
Víkingur komst í 3-1 í leiknum í gær en að sögn Arnars varð kæruleysi til þess að Keflavík jafnaði í 3-3.
Lestu um leikinn: Víkingur R. 6 - 7 Keflavík
„Undirbúningstímabilið hefur verið upp og niður. Það hafa verið fínir kaflar inni á milli og það var fínn stígandi í liðinu fram að þessum leik. Við áttum að ganga frá leiknum en menn urðu kærulausir. Við fengum fullt af færum til að klára leikinn. Það er fínt að fá svona leik í andlitið stuttu fyrir mót. Menn þurfa að girða sig í brók allan leiktimann," segir Arnar.
Hægt er að sjá viðtalið við Arnar í sjónvarpinu hér að ofan en hann er meðal annars spurður út í framherjamál. Helgi Guðjónsson hefur verið funheitur á undirbúningstímabilinu en honum brást bogalistin í þessum leik gegn Keflavík.
„Helgi hefur gert 7-8 mörk í síðustu leikjum. Hann fékk mörg góð færi núna í þessum leik og maður hefði fyrst og fremst áhyggjur ef hann væri ekki að fá færi. Við erum að gefa honum traust núna. Það er þannig með alla leikmenn að þegar þú ferð á stóra sviðið þá fá menn mislangan tíma til að sanna að þeir séu traustsins verðir," segir Arnar.
Athugasemdir
