„Það er ánægjulegt að ná í öll þrjú stigin. Heilt yfir fannst mér við eiga það skilið þó það hafi verið tæpt í lokin," sagði Kári Árnason, miðvörður Víkinga, eftir 1-0 sigur á KA í toppbaráttuslag í Pepsi Max-deildinni í kvöld.
Lestu um leikinn: KA 0 - 1 Víkingur R.
„Þeir voru mjög þéttir og það var erfitt að finna glufur. Þeir gerðu vel í fyrri hálfleik að loka svæðum. Við héldum boltanum nánast allan fyrri hálfleikinn en þeir gerðu mjög vel í að loka svæðum og gáfu fá færi á sér."
Víkingar tóku forystuna eftir um klukkutíma leik þegar Nikolaj Hansen skoraði. KA fékk tækifæri til að jafna úr vítaspyrnu í uppbótartíma en Hallgrímur Mar Steingrímsson brenndi af.
„Þetta opnaðist í seinni hálfleik og þeir komu framar á völlinn. Við náðum að refsa þeim einu sinni sem reyndist vera nóg."
„Ég er ekki viss um að þetta hafi verið víti. Ég held að það hafi verið bolti þarna á milli en ég verð að sjá þetta aftur. Ég er gríðarlega stoltur af þessum strákum, við erum orðnir helvíti sterkt lið."
Víkingar eru komnir með 13 stig á toppnum. Hvað er öðruvísi en í fyrra þar sem liðið strögglaði?
„Við erum búnir að setja áherslu á leikstjórn, hvernig leikir spilast og hvað er mikilvægt í hverjum leik fyrir sig. Við reynum að leggja upp fyrir leikina hvernig þetta mun líta út og hvernig sé hægt að tækla ákveðnar stöður. Við erum enn með okkar prinsipp... ég ætla ekki að fara að gefa upp okkar leyndarmál en við erum líka með aðrar áherslur og það gerir það að verkum að það er auðveldara að ná í úrslit og hanga á þeim."
Hægt er að hlusta á allt viðtalið hér að ofan.
Athugasemdir