Heimild: Vísir 

Sjá einnig:
„Fáir hafa hæfileika á borð við Viktor Örlyg"
Viktor fær rosalega athygli - Sá fjölhæfasti í öllum heiminum?
Viktor svaraði kallinu - „Hanskarnir komnir á fyrir æfingu dagsins"

Fótbolti.net rædd við Arnar Gunnlaugsson, þjálfara Víkings, í gær og spurði hann út í Viktor Örlyg. Er ekkert mál að fá hann í að leysa alls konar stöður eins og miðvörðinn og bakvörðinn?

„Það er ekkert mál sko, ég held að hann sé bara ánægður að spila. En það er stórkostlegt að hafa svona leikmann í sínum hóp sem getur leyst jafnmargar stöður. Að missa Halla og Kyle og vera með lið í toppbaráttu og geta fengið miðjumann, bakvörð, senter og ég veit ekki hvað og hvað til að leysa miðvarðarstöðu - sem er mjög erfið staða - og gera það jafnvel og hann hefur gert er bara ólýsanlegt."

„Hingað til hefur hann ekki bankað á dyrnar og lýst yfir óánægju sinni enda er hann einn mesti Víkingur og völ er á," sagði Arnar.

Viktor er hins vegar ekki bara góður í fótbolta. Hann er einnig góður á saumavélinni eins og Stefán Árni Pálsson á Stöð 2 kynntist í gær. Viktor hannar og saumar snyrtitöskur og kortaveski úr leðri sem kemur úr bóndabæ langafa hans. Hér fyrir neðan má sjá innslagið sem birt var í kvöldfréttum Stöð 2 í gær.

Næsti leikur Víkings er í kvöld þar sem liðið mætir velska liðinu TNS á Víkingsvelli. Um fyrri leik liðanna er að ræða í 2. umferð forkeppni Sambandsdeildarinnar.