Lengjudeildin: Völsungur og Njarðvík skildu jöfn

Völsungur og Njarðvík skildu jöfn, 1-1, í 12. umferð Lengjudeildar karla á PCC-vellinum á Húsavík í dag.

Gestirnir voru með góða stjórn á leiknum fyrstu 45 mínúturnar og fóru verðskuldað með eins marks forystu inn í hálfleikinn, en eina markið gerði Tómas Bjarki Jónsson á 28. mínútu.

Amin Cosic, sem mun ganga í raðir KR í næstu viku, hljóp upp vinstri kantinn, lék á varnarmann áður en hann kom boltanum á Tómas sem kláraði af miklu öryggi.

Leikmenn Völsungs komu sterkari út í síðari hálfleikinn og pressuðu NJarðvíkinga hátt uppi en hleyptu Njarðvíkingum oft í ágætis stöður til að gera út um leikinn.

Amin átti skot hárfínt framhjá markinu og þá voru Njarðvíkingar handvissir um að boltinn hafi farið inn í markið þegar hálftími var eftir er Ívar Arnbro Þórhallsson, markvörður Völsungs, virtist missa boltann inn fyrir línuna, en dómarinn var ekki á sama máli og áfram hélt leikurinn.

Í kjölfarið kom Steinþór Freyr Þorsteinsson inn á hjá heimamönnum og rúmum tíu mínútum síðar átti hann hornspyrnu sem Elvar Baldvinsson stangaði í netið.

Eftir markið fóru Njarðvíkingar í mikla pressu og uppskáru nokkur góð færi. Amin átti bæði færin en Ívar Arnbro varði meistaralega í tvígang.

Mikilvægar vörslur hjá Ívari og aldrei að vita nema þær muni skipta sköpum þegar talið verður upp úr pokanum í lok tímabils.

Liðin ætluðu sér að sækja til sigurs í dag og vildu heimamenn fá vítaspyrnu þegar lítið var eftir. Elfar Árni Aðalsteinsson og Jakob Héðinn Róbertsson spiluðu vel sín á milli áður en Elfar slapp í gegn á móti markverði og var tekinn niður, en Sveinn Arnarsson, dómari leiksins, veifaði þessu frá.

Fleiri urðu mörkin ekki á Húsavík og lokatölur því 1-1.

Njarðvíkingar hefðu með sigri farið á toppinn en þurfa að sætta við 2. sætið í bili. Liðið er þar með 24 stig, stigi frá toppnum, en Völsungur í 8. sæti með 14 stig.