Guðni Eiríks: Erfið fæðing en hún hófst
Guðni Eiríksson, þjálfari FH
Mynd: Fótbolti.net - Hafliði Breiðfjörð
Guðni Eiríksson, þjálfari FH
Mynd: Fótbolti.net - Hafliði Breiðfjörð
Guðni Eiríksson þjálfari FH sagðist eðlilega vera mjög sáttur eftir 3-0 útisigur á Víking R. í Lengjudeild kvenna í kvöld.
„Frábær þrjú stig á erfiðum heimavelli og þetta var bara erfið fæðing en hún hófst og ég er bara mjög stoltur af mínu liði og bara vinnuframlagi leikmanna," sagði Guðni í viðtali eftir leik.
„Mér fannst hún (frammistaðan) vera svolítið sloppy í byrjun svo ég sé að sletta og Víkingar byrjuðu mjög ákaft og grimmt og voru betri aðilinn í byrjun. Voru einfaldlega ákveðnari, grimmari og það tók okkur tíma að vinna okkur inn í þetta. 1-0 gaf ekki endilega rétta mynd af fyrri hálfleik en mér fannst seinni hálfleikurinn mun, mun betri og þegar allt er á heildina litið, þá sanngjarn sigur."
Aldís Guðlaugsdóttir, Vigdís Edda Friðriksdóttir, Valgerðir Ósk Valsdóttir og Berglind Þrastardóttir spiluðu sinn fyrsta leik fyrir FH eftir að hafa komið núna í félagaskiptaglugganum. Guðni var ánægður með þeirra frammistöðu í kvöld.
„Já bara mjög. Það er erfitt að spila fyrsta leik eftir skamman tíma með liðinu, að fara inn í taktík og ákefð og allskonar breytur og það tekur sinn tíma en þær skiluðu sínu."
Aldís átti frábæran leik í marki FH og kom nokkrum sinnum í veg fyrir að Víkingur kæmi inn marki í kvöld.
„Hún bara stóð sig frábærlega og bara glæsileg frumraun hjá henni."
Viðtalið í heild má sjá í spilaranum hér fyrir ofan. Þar talar Guðni meðal annars um framhaldið en FH er á toppi deildarinnar.
