Nú er ljóst hvaða lið geta mæst í 3. umferð í forkeppni Evrópudeildarinnar en Stjarnan og FH eiga möguleika á afar öflugum andstæðingum þar. Valsmenn eru þó nokkuð heppnir með dráttinn.
Það er auðvitað ljóst að Valur mætir FC Santa Coloma frá Andorra í 2. umferð í forkeppninni en ef liðið kemst áfram í 3. umferð þá mætir það annað hvort Sheriff frá Moldavíu eða Shkenidja frá Makedóníu.
Sheriff er langbesta liðið í Moldavíu en liðið varð meistari á síðustu leiktíð og er þá á góðri leið með að gera slíkt hið sama á þessari leiktíð.
Shkendija vann deildina í Makedóníu á síðasta tímabili eftir að hafa lent í öðru sæti tímabilið áður. Félagið er aðeins 38 ára gamalt en hefur aldrei komist í riðlakeppni í Evrópukeppni.
FH mætir þá Hapoel Haifa frá Ísrael en ef liðið kemst áfram þá verður andstæðingurinn Atalanta frá Ítalíu eða Sarajevo frá Bosníu og Herzegóvínu. Atalanta þekkja auðvitað allir úr Seríu A á Ítalíu en liðið hefur verið í mikilli sókn síðustu ár.
Stjarnan mætir FCK í 2. umferðinni en getur síðan mætt CSKA Sofia frá Búlgaríu eða Admira Wacker Mödling frá Austurríki.
Jóhann Berg Guðmundsson og liðsfélagar hans í Burnley þurfa að yfirstíga Aberdeen en ef það gengur upp þá mætir liðið Istanbul Basaksehir frá Tyrklandi í 3. umferð.
Viðar Örn Kjartansson leikur með Maccabi Tel Aviv en lið hans er heppið með drátt ef það kemst áfram. Tobal Kostanay frá Kasakstan eða Pyunik frá Armeníu verður andstæðingurinn í þriðju umferð.
Athugasemdir