Lestu um leikinn: Leiknir R. 0 -  0 HK

Bæði lið lögðust aftarlega og beittu skyndisóknum í leiknum en HK-ingar reyndu hvað þeir gátu til að stela sigrinum undir lokin.

Það gekk ekki upp og því deildu liðin stigunum. HK-ingar eru í næst neðsta sæti og þurfa því á stigunum að halda á meðan Leiknismenn eru í nokkuð þægilegri stöðu með 22 stig, átta stigum frá fallsæti.

„Auðvitað hefði maður viljað sigur hérna í dag. Við vorum komnir til að sækja þrjú stig en þetta var ekki fallegasti fótboltinn og erfitt að spila þegar bæði lið voru að falla aftarlega og beita einhverjum skynidsóknum þannig jafntefli var held ég bara sanngjarnt," sagði Leifur við Fótbolta.net.

„Ég held að það hafi verið smá stress í byrjun sérstaklega og svo í lokin vorum við bara að dæla þessu á Stebba til að fá hlaupin í kring og svona. Við reyndum að sækja þetta í lokin og þeir voru orðnir helvíti margir þarna aftast, það kom ekki, en við tökum þessu samt það er skárra en að fá ekki neitt."

„Þetta breytir eiginlega ekki neinu fyrir okkur nema við þurfum að vinna næsta leik. Við förum í hvern einasta leik til að vinna og höfum fulla trú á þessu verkefni. Við eigum leik inn í Kór næst og vonandi verður aðeins meiri fótbolti."

Leiknismenn skoruðu á 21. mínútu er Bjarki Aðalsteinsson en markið var dæmt af.

„Sólon var í markmanninum okkar eða svo sagði dómarinn. Ég sá það ekki en hann sagði hann hefði verið rangstæður að plokka markmanninn og ef svo var þá er þetta réttur dómur. Vel gert hjá dómaranum ef það er rétt," sagði hann ennfremur.

Í lok viðtals var hann spurður hvort HK væri nokkuð að fara að falla.

„Nei, ekki á minni vakt," sagði fyrirliðinn.

Hægt er að sjá viðtalið í heild sinni hér fyrir ofan.