Frá síðustu útgáfu listans hefur Ísland spilað þrjá leiki og unnið tvo, gegn Skotlandi og Filippseyjum, og gert eitt jafntefli gegn Wales á Pinatar Cup.

Ísland fór með sigur á Pinatar Cup æfingamótinu og bætti þar bikar í safnið.

Aldrei hefur Ísland verið ofar á heimslistanum en fyrir var 15. sætið besti árangurinn.

Þorsteinn Halldórsson, landsliðsþjálfari Íslands, sat fyrir svörum í Laugardalnum í dag er nýr hópur var gefinn út. Hann var spurður út í heimslistann af fréttamanni Fótbolta.net.

„Það er alltaf gaman að sjá þetta svo sem, en heimslistinn er bara bull að mörgu leyti. Við erum í 14. sæti á heimslistanum en erum í tólfta sæti á Evrópulista UEFA sem miðar bara við keppnisleiki. Þú getur valið þér andstæðinga í keppnisleikjum og unnið alla leiki, þá ferðu mjög hátt á heimslistanum," sagði Þorsteinn og bætti við að heimslistinn væri ekki marktækur að miklu leyti.

Krefjandi leikir framundan
Næsta verkefni liðsins eru tveir vináttuleikir í apríl. Ísland mætir Nýja Sjálandi í Antalya í Tyrklandi 7. apríl og Sviss í Zürich í Sviss 11. apríl.

Þorsteinn kom inn á það á fundinum að þetta væru krefjandi leikir, að við hefðum ekki unnið Sviss frá því að Vanda Sigurgeirsdóttir, núverandi formaður KSÍ, var í íslenska landsliðinu. Liðið er að sækja sér krefjandi leiki núna til að undirbúa sig fyrir Þjóðadeildina síðar á árinu. Leikirnir þar verða mjög krefjandi og skipta máli upp á það að komast inn á stórmót.