Fulham vann dýrmætan 1-0 sigur á Aston Villa í 34. umferð ensku úrvalsdeildarinnar á Craven Cottage í dag. Ryan Sessegnon, sem skrifaði undir nýjan samning við Fulham á dögunum, var hetja liðsins.

Lundúnaliðið þurfti á sigrinum að halda til þess að halda vonum sínum á lífi um að komast í Evrópukeppni á næsta tímabili.

Það var fátt um fína drætti í fyrri hálfleiknum og vantaði aðeins upp á ákefðina, en eina markið kom undir lok hálfleiksins er Sessegnon hirti frákast í teignum og hamraði boltanum í hægra hornið.

Viðeigandi að hann hafi skorað markið aðeins nokkrum dögum eftir að hafa skrifað undir eins árs framlengingu.

Fulham kom boltanum aftur í netið eftir rúman klukkutíma leik er Timothy Castagne stangaði boltanum í netið eftir horn, en markið var tekið af þar sem Sander Berge hélt í Emi Martínez, markvörð Villa, í aðdragandanum.

Tammy Abraham kom sér í dauðafæri sjö mínútum fyrir lok venjulegs leiktíma en brást bogalistin. Unai Emery, stjóri Villa, leyndi ekki vonbrigðum sínum á hliðarlínunni.

Slappt hjá Villa sem þurfti á sigrinum að halda í Meistaradeildarbaráttunni. Það var Fulham sem fagnaði í dag, en liðið er komið upp í 10. sæti með 48 stig, aðeins einu stigi frá Evrópusæti á meðan Villa er í 4. sæti með 58 stig.