Gylfi Tryggvason, þjálfari Grindavík/Njarðvík, var ánægður með frammistöðu síns liðs þrátt fyrir 2-1 tap gegn Val á Hlíðarenda.
„Ég veit ekkert hvað ég á að segja, þetta var rosalega steiktur leikur.“
Lestu um leikinn: Valur 2 - 1 Grindavík/Njarðvík
Þrátt fyrir tapið var hann afar sáttur með spilamennsku nýliðanna stóran hluta leiksins.
„Mér fannst við bara frábærar í dag, frá 10. til 90. Mínútu. Ég er eiginlega í smá sjokki hvað frammistaðan í dag var rosalega góð. Fyrstu tíu mínúturnar þurftum við aðeins að vinna okkur inn í leikinn.“
„Mér fannst við bara spila geggjaðan bolta í 80 mínútur, þannig ég er raunverulega bara mjög ánægður. 90% af tilfinningum mínum eru bara jákvæðar.“
Hann telur liðið hafa sýnt að það eigi fullt erindi í deildina.
„Ef þetta er það sem koma skal þá lýst mér bara hrikalega vel á sumarið.“
Tvö stór atvik komu undir lok leiks og taldi Gylfi sitt lið hafa átt að fá víti.
„Það sem augu mín sáu í mómentinu var að þetta er bara pjúra vítaspyrna, því boltinn er á leiðinni bara í bláhornið og ég er með frábæran vinkil hérna, bara sama vinkil og fjórði dómarinn. Bara pjúra hendi, bara frábær markvarsla hjá útileikmanni Vals.“
„Þar erum við rændar vítaspyrnu og vítaspyrnur enda oft með marki þannig þá erum við allt í einu með jafntefli.“
Einnig fékk leikmaður liðsins, Maci Nicole Teater, rautt spjald undir lok leiks, sem þýðir að hún missir af næstu tveimur leikjum ef litið er til hártogs dóma á síðasta tímabili.
„Það er náttúrlega ótrúlega dýrkeypt þegar það eru 50 sekúndur eftir.“
„Ég veit ekki af hverju leikmaður ætti að vera að toga í hár á miðjumanni þegar við erum að reyna að ná boltanum og 50 sekúndur eftir. Ég þarf að sjá það aftur, ég sá það ekki.“
Sjáðu viðtalið í heild í spilaranum hér að ofan.
