Pepsi Max-deild kvenna: Mary og Stephanie afgreiddu Selfoss

Selfoss, sem er nýbúið að missa Hólmfríði Magnúsdóttur og Önnu Björk Kristjánsdóttur í atvinnumennsku, tapaði óvænt gegn Þrótti R. í fyrsta leik dagsins í Pepsi Max-deild kvenna.

Dagný Brynjarsdóttir var ekki í hópi hjá Selfyssingum og sást á liðinu að helstu stjörnurnar vantaði.

Gestirnir úr Laugardalnum komust yfir í fyrri hálfleik þegar Mary Alice Vignola skoraði eftir laglega stungusendingu frá Stephanie Mariana Ribeiro.

Það vantaði allt bit í sóknarleik Selfyssinga og voru vandræði í vörninni og tvöfaldaði Stephanie forystu Þróttar skömmu fyrir leikhlé. Tveimur mínútum síðar lagði hún svo aftur upp fyrir Mary og staðan 0-3 í leikhlé.

Selfoss skipti um gír í síðari hálfleik og minnkaði Tiffany Janea McCarty muninn á 65. mínútu. Nær komust Selfyssingar ekki og afar dýrmætur sigur Þróttara staðreynd.

Selfoss er áfram í fjórða sæti eftir tapið. Þróttur er komið úr fallsæti í bili en fallbaráttuslagur FH og Þórs/KA er í gangi.

Sjá textalýsingu

Það tekur tíma fyrir stöðutöfluna að uppfærast.